Гимназијата со блокирана сметка и без струја, Камбери бара градоначалникот да пружи рака за соработка

По неколку негови колеги од гостиварски училишта, со поплаки кон општината денес излезе и директорот на гимназијата Џези Камбери.

„Раководството на општина Гостивар постојано одбива соработка поради што ние се наоѓаме во тешка ситуација во која е загрозено одвивањето на наставниот процес. Сето тоа оди на товар на учениците, родителите и професорите. Нашето училиште два месеци има блокирана жиро сметка, не се потпишани согласностите за десетина вработувања и исклучена ни е електричната енергија. Ние сме институција со долга традиција од чии клупи излегле голем број кадри, и ваквата ситуација е голем срам за институцијата, за мене, за наставниот кадар, за градоначалникот и за општината. Кога е во прашање образованието, градоначалникот не треба да гледа низ призма на политиката, туку да пружи рака за соработка заеднички да ги надминеме овие несакани состојби. “,  изјави Камбери.

Настанатите проблеми и несогласувања пред почетокот на новата учебна година, локалната власт и директорите на училиштата во Гостивар ќе ги „пеглаат“ на состанок кој треба да се одржи попладнево во општина Гостивар.

На претходните обвинувања, општинарите одговорија дека не се вистинити и дека обврските кон училиштата општината редовно ги исполнува.