Годинава фатени 20-тина странци кои на црно работеле во полошкото подрачје

И оваа година, Секторот за внатрешни работи Тетово, континуирано презема мерки за откривање и санкционирање на странски државјани кои непријавено престојуваат и работат на полошкото подрачје. Станува збор за таканаречени економски емигранти, најчесто од соседството, кои најмногу од април до октомври извршуваат градежни или земјоделски работи, претежно во селата. Во изминатите пет месеци биле законски санкционирани 21 странски државјанин, од кои 15 од Република Албанија, 5 од Република Косово и 1 од Република Србија. Против нив изготвени се соодветни поднесоци и депортирани се во матичните земји, соопшти СВР.

Минатата година, вкупниот број на странски државјани „илегалци“ со непријавен престој или незаконско вработување изнесувал 92, повторно најмногу (60) од Република Албанија, 16 од Косово и од уште неколку други земји (Иран, Бангладеш, Пакистан, Сирија и Мароко), но тие само транзитирале низ подрачјето.

Странските државјани на различна возраст, од 17 до 55 години, претежно ги ангажираат поединци за градежни или за полски работи, а минатите години некои од нив  неретко се сомничеа и за инволвираност во криминални активности, пред сѐ во кражби.