Голем дел пациенти во Гостивар што поминале ковид имаат антитела на вирусот

Докажаното присуство на антитела во крвта треба да биде сигурен показател дека организмот поминал инфекција и развил имунитет кон истата. Сепак, во случајот со ковид-19 ширум светот има различни сознанија и студии околку оваа проблематика.

Голем дел од граѓаните во Гостивар кои прележале ковид, особено медицинскиот персонал, во лабораторијата на болницата испитуваат дали развиле антитела на вирусот. Дали откако ја поминав короната, имам имунитет што ме штити од повторна зараза? Ова е прашањето што најчесто си го поставуваат пациентите. Испитувањето на присуство на антитела на ковид се врши преку крвта. Досегашното искуство на лекарите за пациентите од Гостивар покажало дека повеќето развиле антитела, односно стекнале некаков имунитет.

Во болничката лабораторија за сега, може само да се потврди дали пациентот има или нема антитела, но не и во кој процент.

„Во последно време благодарение на раководителот Африм во болничката лабораторија успеавме да добиеме тестови за антитела и голем дел пациенти како што ни кажуваат, особено медицинскиот персонал кој го поминал вирусот имаат создадено антитела. Немаме се уште испитување на процент, но очекуваме наскоро на микробиологија да добијат соодветна апаратура со која ќе се покаже прецизно колку има ИгГ и ИгМ антитела во организамот на човекот.“, вели д-р Ратко Наумоски, раководител на инфективно одделение во Гостивар

Научната и медицинската фела во светот се‘ уште истражуваат колку трае и во која мера штити од нова зараза стекнатиот имунитет на коронавирусот. Одредени наводи укажуваат дека оздравеното лице нема да фати повторно ковид најмалку пет месеци, а нивото на заштита се движи околу 80%.

Лекарите советуваат без оглед дека некој ја поминал заразата со ковид, да ги променува и почитува мерките за заштита и протоколите, исто како да не ја прележал болеста.

Во истражување направено во Британија на над 6.600 оздравени од ковид, во  44 случаи биле пронајдени потенцијални повторни заразувања. Се потврдило и дека некои луѓе со антитела и понатаму можат да го пренесуваат вирусот.