Голема пресметка во Битола: КК Пелистер – КК Гостивар од 18.30 часот

Најпосле се најде начин да се одигра големото дерби помеѓу екипите на КК Пелистер и КК Гостивар во оваа натпреварувачка сезона 2020/2021. Дуел кој требаше да биде одигран на 11 ноември минатата година во рамки на 6. коло, но поради низа одлагања на битолчани, заостанатата средба ќе се одигра денес.

Пелистер е лидер на табелата, од 10 одиграни натпревари имаат скор од 9 победи и само еден пораз. Финансиски силниот проект на битолчани овозможи годинава да ангажираат квалитетни кошаркари кои важат за едни од фаворитите за врвот на табелата. Трајковски, Стајиќ, Кесар, Калахан, Малешевиќ, Вилијамс се главните адути на тренерот Илиевски, со кого сезонава имаат одличен успех.

КК Гостивар полека но сигурно го фаќа препознатливиот победнички ритам. Со најновите засилувања кои ја внесоа потребната енергичност, гостиварци успеаа да нанижат три победи по ред совладувајќи ги екипите на МЗТ 2, Куманово и ФМП во период од само 8 дена.

Како и да е, денешниот дуел ќе биде еден од најинтересните во досегашниот дел од првенството. Натпреварот се игра во „Боро Чурлевски“ во Битола од 18.30 часот.

За националната МРТВ и новиот аналоген спортски канал, во период кога на љубителите на кошарката им е забрането да присуствуваат во спортските сали, натпревари од вакви размери, во најелитното национално кошаркарско првенство се тотална енигма. Со тоа немој да очекувате директен пренос, пред почеток на натпреварот ќе објавиме линк каде може да се следи дуелот преку интернет.