Голема трагедија-51 лице загина во пожар во дискотека во Кочани, стотина се повредени

Педесет и едно лице загина во дискотека во Кочани во која ноќеска избувнал пожар за време на концерт на групата ДНК.

Според информациите кои утрово ги сподели Министерот за внатрешни работи Панче Тошковски пожарот настанал поради употреба на пиротехнички средства. Огнот избувнал од искри од пиротехнички средства, прскалките зафатиле тавански дел од објектот кој бил лесно запалив и брзо се проширил, кажа министерот.

Тошковски рече дека се истражуваат причините за пожарот во дискотеката, дека има приведено лица за случајот.

– Имајте разбирање, во овој момент најбитно е да ги утврдиме сите факти и дејствија., Да изразиме сочувство до најблиските на загинатите и повредените, рече министерот.

Повеќето од повредените  лица во пожарот се пренесени во кочанската општа болница каде се уште им се укажува медицинска помош.

Поради сериозност на повредите здобиени како резултат на пожарот и вдишување чад дел од повредените се пренесени во Клиничката болница во Штип, во Градската општа болница „8 Септември“ и на Скопските клиники.

Пред Болницата во Кочани се наоѓаат голем број на блиски и роднини на повредените и на починатите. Општинската организација на Црвен крст прави списоци за утврдување на идентитетот на загинатите лица.