Гостивар со богато културно-историско наследство

Осумнаесетти април во светот се одбележува како Ден на спомениците и локалитетите со културно-историско значење. Гостиварскиот регион е богат со објекти од недвижно културно-историско наследство кои сведочат за одредени периоди и развојот на градот и околината.

Од 2010-та година, Гостивар доби установа која се грижи за заштита на значајните објекти и локалитети од минатото. Во текот на неколкугодишното работење, Конзерваторскиот Центар реализираше повеќе проекти како обнова на фасадите на старите градби, на Беговата куќа, санација на Саат Кулата и други. Во 2014-та година, Конзерваторскиот Центар ја издаде книгата „Културното наследство во градот Гостивар “ во која се дадени историски и архитектонски описи и информации за сите значајни објекти: црквите „Успение на Пресвета Богородица“ и „Св.Димитрија“, Саат Кулата и Саат Џамијата, Беговата куќа и куќата на Ахмед Чако, Медресето и џамиите во селата Равен и Симница. Книгата е четиријазична: на македонски, албански, турски и на англиски јазик, а текстовите се поткрепени со фотографии.

Во холот на Конзерваторскиот Центар пак се изложени стари фотографии од минатото на Гостивар низ кои може да се видат трансформациите и обележјата на градот.

Законот го дефинира културното наследство како материјални и нематеријални добра кои, со археолошки, етнолошки, историски, уметнички, архитектонски, урбанистички, социолошки и други научни или културни вредности имаат културно и историско значење.  Културното наследство е темелна вредност на Република Македонија, а заштитата на културното наследство е од јавен интерес и се остварува задолжително на целата територија на Република Македонија.