Гостивар доби експерт за еколошки криминалитет на реки и езера

Гостиварецот Љатиф Љатифи се здоби со титулата Доктор на науки во областа на еколошко вештачење на површинските води. Тој денес на Факултетот за безбедност во Скопје успешно ја одбрани докторската дисертација „Форензика во екологијата“. Станува збор за тема врзана со криминологија во животната средина, кај нас се` уште недоволно истражена област, но многу актуелна и популарна во западните земји.

„Ја одбрав оваа тема за да можам да докажувам криминал во површинските води во Македонија. Верувам дека со истражувањето ќе се подигне нивото на работата на државните инспектори за животна средина бидејќи освен инпекцискиот увид на лице место со утврдување на фактичката состојба, инспекторите ќе извршат ситуационо вештачење на лице место и ќе се обезбедат услови за да бидат криминалисти-специјалисти преку обезбедување на доволен и квалитетен број на податоци и материјални докази со кои би се разјаснило и би се докажало кривичното дело“, вели експертот по екологија на површински води.

Љатиф Љатифи е роден 1973 година во Гостивар. Во 2003-та, завршил технолошки факултет на Универзитетот Св.Кирил и Методиј во Скопје. Во 2007-ма се здобил со звање професор по хемија на универзитетот во Тетово. Во 2011-та магистрирал на Универзитетот на Југоисточна Европа на тема Квалитетот на Мавровското езеро според европски директиви. Работи како инспектор во Министерството за животна средина.