Гостивар домаќин на Меѓународна конференција за историја на религиите

Во Гостивар денес за прв пат се одржа Меѓународна конференција за историја на религиите, на која говореа професори предавачи на универзитети во Турција и Германија. Настанот го организираше турската Фондација за наука, филозофија и религија, а Гостивар беше избран како град домаќин на иницијатива на гостиварецот Доган Пурде.

„Пред три месеци ваква конференција се одржа во Скопје и јас како гостиварчанец, покренав иницијатива вториот настан да се организира во нашиот град. Говорници се познати професори, кои отвораат дискусии на тема историја на религиите, конкретно за исламот и христијанството. Сметаме дека е важно да има ваков тип на предавања, конференции, луѓето да дојдат до повеќе знаење за религиите, подобро да може на тој начин да се запознаваат меѓу себе. Тоа е основа на соживотот, а ете ние што живееме во Гостивар за сите сме пример за соживот и почит.“, кажа Пурде.

Пред присутните свои излагања за историските текови во религиите имаа доцент доктор Зафер Дујгу од Истражувачкиот институт за религиозни науки на Универзитетот во Измир, Турција и доктор Тургул Курт од Академијата за светски религии во Берлин, Германија.

По нивните воведни излагања присутните имаа можности да поставуваат прашања и да развиваат дебати.