Гостивар домаќин на NASA Олимпијада за вселената

Стотина основци и средношколци од полошкиот регион се дел од првата NASA Националната Олимпијада за вселената, која денес се одржува во средното техничко училиште во Гостивар. Учениците во тимови под менторство на своите професори изработуваат проекти и прават експерименти за откривање на мистериите на вселената и создаваат нови иновативни решенија за решавање на предизвиците зададени од американстака агенција за вселенски истражувања NASA.

Натпреварувањето го организира ЊуМенс Бизнис Акцелераторот и Фондацијата Голдилокс со поддршка на Американската Амбасада.

„Ова е регионален натпревар во форма на хакатон и децата се поделени во две категории, основци и средношколци. Тие работат на решенија на три предизвици зададени претходно, кои се однесуваат на изнаоѓање решенија со некаква макета како да се стигне на пример од Земјата до Марс, потоа изработуваат стрипови, видео, апликација итн. Практично идејата на целокупниот настан е да овозможиме промоција на СТЕМ вештините, да ги поттикнеме младите да се интересираат за техничките науки, да се интересираат за науките поврзани со Земјата, вселената, универзумот, и да бараат начини како да го направат светот, иднината, нашето живеење подобро и поубаво.“ , појасни Катерина Златаноска Попова, координатор на Првата Олимпијада за вселената.

На натпреварувањето учествуваат ученици од основни и средни училишта од Тетово, Брвеница, Јегуновце, Маврово Ростуше, Врапчиште, Желино и градот домаќин Гостивар. Во подготовките и изработката на нивните проекти и решенија им помагаат менторите, наставници и професори физика, хемија, географија…Децата развиваат идеи како да се направи ракета од рециклирачки материјал, истражуваат Дали Месечината може да се гледа само ноќе и др.

Гостивар домаќин на NASA Олимпијада за вселената

Сите тимови во текот на денот ќе имаат можност да го презентираат она што го смислиле и изработиле пред жири комисија којашто ги оценува. Победничките тимови во двете категории основци и средношколци ќе добијат медали и во септември ќе учествуваат на голем завршен настан во Скопје со победниците од останатите регионални Олимпијади каде ќе имаат можност да лансираат експеримент со специјален балон кој ќе лета до границата на вселената.

Инаку, СТЕМ-учење претставува интердисциплинарен пристап на учење кој ги спојува науката, технологијата, инженерството и математиката. Терминот СТЕМ е кратенка од: Science – Наука, Technology – Технологија, Engineering – Инженерство, Mathematics – Математика.