Гостивар донесе Акциски план за унапредување на правата на лицата со попреченост

Со низа активности и проекти Гостивар ќе прави напори да ги унапреди правата на лицата со посебни потреби кои живеат на подрачјето. За таа намена на денешната седница на Советот на Општина Гостивар, беше усвоен Акциски план кој опфаќа делување во неколку области: јавна свест, физички пристап, образование, спорт и култура. Документот е подготвен од страна на работна група.

„Се работи за двегодишен Акциски план и при подготовката гледавме да биде реален, предвиденото да може да се реализира, а не да биде само список на желби. Планирани се средби со ученици, наставници, родители за поголема информираност за правата и потребите на учениците со попреченост, затоа што увидовме дека голем дел не ги знаат бенефициите кои им следуваат. Во делот на физички пристап да се овозможи пристапност во јавните институции, сите семафори да бидат со аудио сигнализација, во централното подрачје да се постават тактилни индикатори, да се обележат паркинг места итн.“, рече меѓу другото во образложението пред советниците, Африм Илјази, координатор на работната група.

Советникот Џеват Фејзули, кој е претседател на Здружението на слепи и лица со оштетен вид „Реалност“ во Гостивар, истакна дека документот ги содржи приоритетите за граѓаните со попречености и ги повика сите колеги советници да го поддржат. Акцискиот план беше усвоен едногласно.