Гостивар една од водечките општини во борбата и превенцијата на дијабетот-Одбележан 14 Ноември

Со добро менаџирање на потребите на пациентите, инсулинската терапија, вметнување едукативни програми за средношколци, Општина Гостивар е една од водечките во борбата и превенцијата на дијабетесот.

Ова е оценката на претседателот на Сојузот на дијабетичари на Македонија, Димче Велев која ја сподели на одбележувањето на 14 Ноември, Светскиот ден на борбата против дијабет, во Гостивар.

„Општина Гостивар е една од водечките во борбата и превенцијата на дијабетесот. И во општата болница сега веќе имаат нови програми во делот на превенција и квалитетно менаџирање на дијабетесот. Во медицинското училиште децата се образоваат со посебни програми и тоа значи дека набрзо ќе имаме уште поквалитетен живот и благосостојба, што се однесува до овој регион.“, кажа Велев нагласувајќи ги барањата кои ги упатуваат до надлежните на државно ниво за подобар живот на лицата кои се соочуваат со дијабет.

„Што се однесува до Македонија, имаме добра иновативна инсулинска терапија, но е многу малку, и е недостапна за сите пациенти на коишто сериозно им треба. Државата треба да го смени моделот на набавка, начинот на дистрибуција. Она што ние го бараме е набавка на сензори за мерење шеќер за секое лице со тип 1, за да може да имаат редовност на училиште, редовност на работа, и продуктивност во својот живот. Исто така и инсулински пумпи, и секој човек да добива апаратче и ленти во својата аптека на рецепт, а не како што сега се дели, не знаеме ни дали снемува, па носиме неквалитетни апаратчиња заради тендерот, кој предвидува да се бира според најниска цена.“, истакна тој.

На настанот, во организација на Здружението на лица со дијабет „Вардар“ од Гостивар и медицинското училиште, во центарот на градот, учениците мереа ниво на шеќер во крвта на минувачите и им делеа летоци со совети за намалување на ризиците од дијабет.

„Преку овие активности наша и цел на нашите ученици е да ги сензибилизираме граѓаните за дијабетесот, што секој човек може да направи за да го превенира, како и за соодветната терапија“, рече директорот на медицинското училиште, Јетон Сулејмани.

На одбележувањето присуствуваше и градоначалникот Ваљбон Лимани.

„Се надевам дека со оваа активност ќе придонесеме да се крене свеста кај граѓаните за поздрав живот, подобар начин на исхрана, физичка активност, како и редовни контроли, сѐ со цел оваа болест, која е веќе пандемиска во светот и кај нас, да има што помалку нови случаи.“ , подвлече Лимани.

По повод 14 Ноември, Здружението „Вардар“ додели благодарници на соработници и поддржувачи на активностите.

Според податоци на Сојузот, во Македонија со дијагноза „дијабет“ има 135.000 лица, но реалната бројка е трипати поголема, односно околу 500.000 лица. Од 130.000 официјално евидентирани 3.300 се со тип 1, од кои околу 500 се деца.