Гостивар го има првиот мултифункционален Центар за социјални услуги по нов модел

Грижа и нега, рехабилитација, поддршка на независно живеење, одмена на семејна грижа и други услуги наменети за лица со попречености и нивните семејства, ќе се испорачуваат  во првиот мултифункционален Центар за социјални услуги во домот и заедницата, кој е отворен во Гостивар, а е наменет за потребите на граѓаните од целиот Полошки регион.

Денес се одржа презентација на моделот на Центарот на која присуствуваа Амбасадорката на Швајцарија во Северна Македонија, Вероник Хулман, министерката за труд и социјална политика, Јованка Тренчевска, градоначалникот на Општина Гостивар, Арбен Таравари,  постојаниот претставник на УНДП во Северна Македонија, Арменд Григорјан,  државниот секретар на Министерството за труд Ресми Ејупи и други гости.

„Со создавање на нови и зајакнувањето на постојните човечки капацитети во заедницата и искористување на расположливите ресурси, придобивка ќе имаат граѓаните кои имаат потреба од нега и грижа, одмена на семејна грижа, рехабилитација, окупација, поддршка за независно живеење, окупација, активација и поддршка за вклучување на пазарот на труд, Во план е и преку овој центар да се испорачува и мерката од Оперативниот план-економија на грижа за регион на Општина Гостивар и тоа преку селектираната граѓанска организација Ресурсен центар. Обуките во рамките на оваа програма се во тек, со учество на 12 невработени, со можности за нивно вработување. Согласно програмата планирано е и воспоставување на верификуван тренинг центар за подготовка на здрава храна во поширокиот регион, за обука по 25-30 лица секоја година. Лицата ќе стекнат практични вештини во кулинарството, со кои ќе можат да конкурираа на пазарот на трудот“ рече Тренчевска.

Градоначалникот Таравари рече дека ова е корисен проект, којшто е роден од идеја, со воља и се реализира со поддршка на УНДП и Амбасадата на Швајцарија.

„Ние ја имавме идејата, УНДП не‘ поддржа, а Швајцарската Амбасада ни помогна да го реализираме овој проект. Како општина го пренаменивме објектот од поранешно приватно средно училиште, партнер ни е Ресурсниот центар, а моментално бараме партнер од приватниот сектор кој ќе не‘ поддржи за функционирање на кујната за подготовка на здрава храна за деца и возрасни. Би ги повикал сите заинтересирани компании да конкурираат на огласот за таа намена.“, рече градоначалникот.

Амбасадорката Хулман истакна дека Швајцарија во континуитет ги поддржува проектите кои го подобруваат животот на населението.

„Секогаш сме подготвени да помогнеме за подобар животен стандард на населението. Тука сме во Гостивар, да го отвориме овој прекрасен мултифункционелн центар, кој е наменет за помош на постарите и лицата со попречености. Ова е еден нов модел кој ги поддржува социјалните услуги. Се надевам дека овој модел ќе се покаже како успешен и ќе може да се имплементира и низ другите опшптини во Северна Македонија“, рече Хулман.

Постојниот претставник на УНДП, Григорјан истакна дека се работи за уникатен центар, кој недостасува во регионалната мрежа на поддршка на лицата со попречености.

„Центарот ќе ја претставува алката која што недостасува во регионалната мрежа на поддршка на лицата со попречености со цел уживање на сите права и живот на еднаква основа со сите останати, согласно насоките кои ги дава Конвенцијата на Обединети нации за правата на лицата со попреченост“, рече Григоријан.

Функционерите и гостите направија обиколка низ Центарот, ги разгледаа просториите, реквизитите, а имаа можност да поразговараат и со дел од претставниците на невладиниот сектор кој делува во областа на заштита на правата на лицата со посебни потреби, како и со корисници на услугите.