Гостивар има таленти со кои може да се гордее!

Успешни математичари, хемичари, пејачи, спортисти… Гостивар има многу млади таленти од различни области, со кои може да се пофали и да се гордее. За придонесот во афирмација на градот и постигнатите резултати, денес општината им додели благодарници и ваучери на шест млади успешни гостиварски таленти.

За нив беше органииран и прием кај градоначалникот Арбен Таравари.

„Нема поголема гордост за еден градоначалник кога ќе биде заедно со толку успешни ученици, денес од наутро одбележуваме само успеси на нашите деца. Она што јас како градоначалник може да го направам е да им посакам се‘ најдобро, да бидам горд на нив, оти тие се најдобрите амбасадори на нашиот град. Посакувам да бидат рол модел, пример, којшто ќе го следат и другите деца, и токму заради тоа ги промовираме, за сите деца да сфатат дека подобар пат за успех од  труд, посветеност и работа нема.“, истакна Таравари.

Признанија за успесите добија: каратистите Доан Османи и Иса Елмази од карате клубот Фати, кои на последното Балканско карате првенство освоија златни медали, Виктор Максимовски, ученик во ОУ „Единство“ кој на математичката Олимпијада освои бронзен медал, Хана Ќазими, ученичка во ОУ „Исмаил Ќемали“ за освоени први места на натпревари по хемија, како и Тамара Грујевска и Лина Демири за значајни музички постигнувања.

Благодарници исто така им беа доделени и на Арлинд Хусеини, тренер на младите успешни каратисти од Гостивар, и на кошаркарскиот тренер Мирко Петревски за резултатите како помошник тренер на Бурсаспорт.