Гостивар ќе бара владини субвенции за струја за училиштата и градинките

На денешната седница на Советот на Општина Гостивар беше усвоена Иницијатива за субвенционирање на електричната енергија потребна за училиштата и градинките на гостиварска територија од страна на Владата.

„Со оглед на фактот дека пред нас е период на енергетска и економска криза, ја покренавме оваа иницијатива за субвенционирање во висина од 60 милиони денари. Ова е со цел да им се помогне на сите основни и средни училишта и детски градинки на територијата на Општина Гостивар, по примерот на субвенционирање на парното греење за жителите на град Скопје.“, нагласија од советничката група на ВМРО ДПМНЕ, подносител на иницијативата.

Советниците изгласаа и одлуки за доделување на финансиска помош од 100.000 денари на Здружението на глуви и наглуви „Тишина“-Гостивар и 37.500 денари на Здружението „Борка“ за мамографија на 50 жени во текот на октомври, како месец на борба против ракот на дојка.