Гостивар ќе му оддаде последна почит на прерано починатиот Стеве Јаковлески

Основачот и фронтмен на првиот гостиварски поп рок бенд Порта Нигра, Стеве Јаковлески ненадејно го загуби животот во несреќен случај во Марбург, Германија кадешто живееше со семејството две и пол децении.

Неговите другари од Гостивар во негова чест организираат помен парастос кој ќе се одржи во среда (20 септември) во црквата „Пресвета Богородица“ на градскиот плоштад во 12 часот.  Другарите го паметат прерано починатиот музичар како прекрасен човек, врвен музичар, добар другар и со овој чин сакаат Гостивар да му одаде последна почит.

Стеве Јаковлески е роден 1964 година во Гостивар. Завршил средно образование во гостиварската гимназија, а дипломирал на Факултетот за геодезија во Скопје.

Неговиот бенд Порта Нигра во свое време беше забележителен на македонската музичка сцена, благодарение на песните кои Стеве ги создаде: Каде одат сите девојки, Гордана, Блуз интродакшан и други. Учествуваа и на Макфест во 1991 година со песната Прости ми на Ванчо Димитров.