Гостивар ќе се раззелени со 350 декоративни дрвца

Екипите на јавното претпријатие за паркинг и зеленило во Гостивар ќе го искористат сончевиот викенд за засадување на декоративни дрвца на повеќе локации во градот. Засадувањето на фиданките започна денес, на потегот од кружниот тек кај Малеарди кон раскрсницата кај поранешен Жито Шар. Планирано е да се засадат вкупно 350 садници.

И градоначалникот на Гостивар, Невзат Бејта денес, заедно со работниците, се фати за лопата. Засади неколку дрвца и порача дека зеленилото мора да се негува и чува.

„Дрвата играат голела улога за животната средина и здравјето на граѓаните и затоа решивме да засадиме нови. Што повеќе дрвца и повеќе зеленило имаме, толку помалку ќе има прашина и ќе дишеме чист воздух“, рече Бејта.

Јавното претпријатие за зеленило, деновиве спроведе активности за уредување на јавни површини со декоративни оази со трева и цвеќиња, покрај Кејот на Вардар и на простори пред колективни згради.