Гостивар: Му го дрпнале паричникот додека чекал во лабораторија

Крадците „оперираат“ насекаде и користат секакви ситуации да дојдат до „плен“. Џепчиите особено бараат „жртви“ на места кадешто има повеќе гужва и каде можат да успеат незабележително да посегнат по торбите и парите на граѓаните и брзо да побегнат.

Утрово, токму една таква кражба е пријавена во чекалницата на лабораторијата на Здравствениот дом во Гостивар, кадешто вообичаено, а особено во вторничните денови има многу пациенти. Седумдесет и деветгодишниот И.И од долнореканското село Жировница пријавил дека бил ограбен додека чекал со сопругата за анализи, а крадецот му одзел паричник во кој имал 150 евра, лични документи и картички. Полицијата соопшти дека работи на откривање на сторителите.

Џепчиите се многу вешти и брзи и мала невнимателност, граѓаните може скапо да ги чини.  Надлежните апелираат граѓаните да бидат претпазливи, по улици, на пазарите, во банките, маркетите и на други места каде постои ризик од кражби, да ги чуваат чантите затворени и блиску до себе.