Гостивар на четврто место по број на кафеани

Гостивар со право може да се нарече град на кафеаните. Последните податоци го ставаат на четврто место во Македонија, по бројот на угостителски објекти. Пред Гостивар се само Тетово, скопската општина Центар и Куманово. Интересна е споредбата која покажува дека нашиот град, има повеќе кафеани и кафулиња од сите девет општини во вардарскиот регион заедно, во кои спаѓаат некои поголеми градови како Велес и Кавадарци.

Податоците доаѓаат од пописот на угостителски објекти и сместувачки капацитети, што го изврши Државниот завод за статистика. Така, според пописот Гостивар има понуда од вкупно 240 кафеани и кафе барови. Тетово е на прво место, со 480 угостителски објекти, потоа следува Центар со 318, па Куманово со само 5 повеќе од Гостивар.

Гледано по региони, предничат полошкиот и скопскиот со околу 1.100 угостителски објекти, во општините што ги опфаќаат.

Во анализите на Државниот завод за статистика, според бројот на население, стои дека во полошко, на 294 жители има една кафеана.

За разлика од угостителските објекти, кои во Гостивар официјално ги има поприлично многу, објекти за сместување нема доволно. При пописот на ДЗС се наведени само четири.