Гостивар повикува: Ајде на планина!..Развој на планински туризам и еко едукација на младите

Развој и промоција на алтернативниот туризам, нови планинарски и велосипедски патеки, мотивирање на младите за здрав начин на живот и еко-едукација. Ова се дел од придобивките што се очекуваат од проектот „Гостивар повикува:Ајде на планина!“, кој официјално отпочна денес со промотивен настан.

Во општина Гостивар во изминатите години беа спроведени неколку проекти за развој на планинарскиот и алтернативен туризам, кој што бележи подем во светски рамки. Сите планинарски, еколошки и други здруженија, како и заинтересирани граѓани, преку денешниот настан дадоа свои предлози за планинарски и велосипедски патеки кои ќе се уредат согласно меѓународни стандарди и врз основа на законските прописи за уредување на планинарски патеки.

Проектот го спроведуваат Асоцијацијата за демократски иницијативи-АДИ и Здружението Планинарски спортови-Шар.

„Граѓанските организации се партнери на општините и ги поддржуваат во обезбедувањето на потребите на локалните заедници. Проектот ќе ги зајакне човечките ресурси за планинарски и алтернативен туризам, ќе развие нови содржини на патеки (планинарски, велосипедски) и дополнителни едукативни можности за природните и културните потенцијали на општината. Истовремено проектот ќе има придонес и во локалниот економски равој, а особено ќе ги стимулира гранките на економијата кои се поврзани со угостителството, занаетчиството и развој на рурален алтернативен туризам.“,  изјави Љулзим Хазири, извршен директор на АДИ

Претседателот на Здружението за планинарски спортови ШАР, Ќерим Абази во обраќањето на настанот изрази задоволство што се дел од проектот, со очекување за успешна реализација и позитивни резултати.

Проектот „Гостивар повикува:Ајде на планина!“ се реализира во соработка со Општина Гостивар, која учествува во финансирањето со околу 20%.

„Како и до сега, продолжуваме да ги поддржуваме активностите на граѓанските организации, здруженија и неформални групи граѓани. Горди сме што успеваме со таквата меѓусебна соработка и партнертсво да спроведуваме корисни активности, во случајов да придонесеме за развој на планинскиот туризам и да ги поттикнеме младите да ги менуваат навиките, да практикуваат здрав начин на живот“, рече претседателот на Советот на Општина Гостивар, Валбон Лимани.

Фокусот на активностите ќе биде ставен врз помладата генерација, изјави планинарскиот водич Исмет Шурбан.

„Тоа ќе резултира со поголеми придобивки како што се: животен стил и добро здравје, посета на локалитети од природно значење, учење за биодиверзитетот на планините и поширокиот регион, планинарска култура, заштита на животната средина итн“, рече Шурбан.

Проектот се реализира во рамки на Регионалната програма за локална демократија во Западен Балкан 2-Reload2, финансирана од ЕУ, спроведена преку УНДП.