Гостивар со рекорден број одобренија за градби во февруари

Во вториот месец од оваа година, во општина Гостивар биле издадени вкупно 98 одобренија за градби, што е исто колку цел скопски регион со сите негови општини заедно. Според податоците од Државниот завод за статистика од вкупниот број одобренија во Гостивар, 86 биле на физички лица, а дванаесет на фирми инвеститори.

Статистиката покажува дека ќе се градат вкупно 227 станови, со 29.075 квадратни метри корисна површина. По бројот на соби најмногу се предвидени трособни и четворособни. Интересно е што ќе се градат и станови со над осум соби и тоа вкупно дванаест.

На ниво на Македонија, во февруари 2017 издадени се 363 одобренија за

градење. Државниот завод за статистика пресмета дека тоа е 8,4% повеќе во однос на истиот месец од претходната година. Од вкупниот број на издадени одобренија 73% се наменети за објекти од високоградба, 7% за објекти од нискоградба и 20% за објекти за реконструкција. Како инвеститори во околу 77% се јавуваат физички лица, а останатите се фирми.

Инаку во јануари во Гостивар биле издадени 37 одобренија за градби.