Гостивар се држи добро со ковидот, бројот на активно болни падна под 120

Во регионот на Гостивар состојбата со коронавирусот и натаму останува стабилна. Продолжува трендот на намален број на новозаразени и пациенти со компликации кои имаат потреба од хоспитализација.

Според последните податоци од Институтот за јавно здравје, на подрачјето што ги опфаќа општините Гостивар, Маврово Ростуше и Врапчиште, активно заразени со корона се 117 лица. Ова е значителен пад, споредено со крајот на декември кога изнесуваше околу 570.   Гостивар доживеа силен ковид удар во текот на ноември, кога секојдневн се бележеа  високи бројки на нови случаи и скоро исполнети болнички капацитети. Таквата состојба траеше околу месец дена, по што постепено настапи смирување. Во новата година за сега, регионот држи стабилно ниво.

Лекарите сепак предупредуваат дека опасност од ширење на вирусот постои и не е за занемарување и го повторуваат апелот за почитување на антиковид мерките: носење маски, избегнување групирање и високо ниво на хигиена.

Од почетокот на пандемијата во триште општини на гостиварското подрачје, потврдени се 3.674 корона позитивни пациенти.