Гостивар со инсулин стои најдобро од сите градови, вели претседателот на гостиварското Здружение на дијабетичари

„За разлика од други градови, Гостивар нема некои поголеми проблеми со недостиг на инсулин за пациентите, може да се пофалиме дека во тој поглед имаме најдобра состојба од цела држава“, оцени претседателот на гостиварското Здружение на дијабетичари „Вардар“, Велко Бобароски.

Според него, лицата со дијабет од Гостивар и околината навреме ја добиваат терапијата, а недостиг се јавува само со лентите за мерење шеќер во крвта и глукомерите.

„Кај нас единствен проблем се лентите и глукомерите, во однос на инсулин горе-долу, освен мали задоцнувања, нема проблеми. На пример за разлика од Тетово, еве на 25 километри од тука е, но состојбата таму не е како што треба. Во Гостивар е одлична  состојбата. Секако, за сето тоа благодарност до градоначалникот Арбен Таравари, до претседателот на Советот Валбон Лимани, медицискиот тим во центарот за дијабет, инсулинската аптека, сите имаат слух“, подвлече Бобароски во емисијата „Минути за секого“ на Gostivarpress.mk, со напомена дека ковид-пандемијата влијаела врз зголемување на бројот на пациенти со дијабет на гостиварското подрачје.

„Пред пандемијата беа околу 7.500, по пандемијата бројката порасна од некаде 8 до 8.500. А прашање е колку има што воопшто не се откриени. Бројката е сигурно уште многу поголема. Би апелирал до самите пациенти и граѓани да се активираат преку здруженијата, затоа што станува збор за доброто на нивното здравје, сепак преку здруженијата се води таа институционална борба за подобрување на состојбите.“, рече Бобароски.

Целата емисија е посветена на тема дијабет, справувањето со оваа состојба, личните предизвици на дијабетичарите, состојбите со обезбедување терапија и помагала и сл.