Гостивар влезе во највисоката фаза на ризик од пренесување на коронавирусот

Секојдневниот пораст на бројот на заразени со корона во Гостивар, го донесе регионот во највисоката фаза по категоризацијата на Светската здравствена организација за ризикот на пренесување на вирусот меѓу населението. Гостивар сега е во фаза на широко распространета трансмисија, заедно со Скопје, Штип и Куманово, означена како фаза 4.

Институтот за јавно здравје (ИЈЗ) го објави збирниот неделен извештај за состојбата со ковид за периодот од 27 јули до 2 август, според кој во гостиварскиот регион биле потврдени 102 нови случаи на корона. Истиот период Скопје е евидентиран со 254, а Штип со 111 новозаразени.

Од вкупниот неделен број 912, во Македонија, најзастапена е возрасната група на лица над 60 години со 209 (22,9%) позитивни. Поголем број на заболени се регистрира и кај лицата на возраст од 30-39 (19,4%), 40-49 години (17,9%) и 50-59 години (17,8%). Најмал број е регистриран кај децата од 0-9 години (3,1%) и 10-19 години (5%).

Според број на активно болни Гостивар (281) моментално е на трето место во земјава, по Скопје (1.354) и Штип (430).

ИЈЗ ја објави и статистиката за активно болните по општини.

Вчера Кризниот штаб во Гостивар одржа редовен состанок, на кој беа повторени апелите за почитување на мерките за заштита од ширење на коронавирусот.