Гостивар во чест на моќта и безграничноста на стиховите – Поетски настан за Денот на поезијата

Љубовта кон пишаниот збор и стихувањето брише граници, ги поврзува луѓето со позитивна нишка и надминува секакви бариери. Ова се докажа и преку настанот посветен на поетското творење, кој се одржа вчеравечер во Гостивар, чиј домаќин беше Центарот за култура АСНОМ.

На сцената во малата сала со свои стихови се претставија дваесетина поети од Гостивар од различни генерации и националности. Манифестацијата се одржа во чест на Светскиот ден на поезијата 21 Март.

„Ви благодариме што ни пруживте една прекрасна вечер, се надевам дека и во иднина ќе имаме уште поубави вакви вечери на поезијата. Знаете дека настанот требаше да го одржиме на 21 Март, но поради големата трагедија во Кочани што вие поетите би ја кажале со еден збор, „непребол“ , ја одржуваме денес. Се надевам дека веќе никогаш и никаде нема да се повтори ваква трагедија.“, рече Валентина Тасеска, организатор на настанот од Центарот за култура.

Дел од претставените песни беа посветени на трагедијата со пожарот во Кочани. Вечерта на стихотворењето беше и можност за потсетување на моќта и безграничноста на поезијата.

„21 март, Светскиот ден на поезијата е ден кога се слави убавината и моќта на стиховите како еден од најстарите облици на човечко изразување. Овој ден ни дава можност да го одбележиме влијанието на поезијата на различни култури и народи и да се потсетиме на нејзината способност да ги поврзува луѓето без оглед на границите и јазиците. Поезијата не само што служи као израз на емоции туку и како начин на размислување, критика и размена на идеи. Преку стиховите можеме да го разбереме светот околу нас , а и да го почувствуваме на личен начин.“, беше речено на одбележувањето.

Од манифестацијата беше испратена порака до сите, но особено до младите кои творат да се охрабрат за учество во поетски читања и конкурси и да ја презентираат својата поезија пред љубителите на пишаниот збор.

„Навистина е убаво да се поканат сите оние кои творат и да се охрабрат сите оние кои што досега не се осмелиле да го презентираат  она што го пишуваат пред други, можеби ке најдат на малку поразлични мислења и критика. Но критиката не мора да значи секогаш дека е негативна, таа може да биде позитивна и да биде давање на насока како понатака да се твори“, се наведе во пораката.

Настанот беше збогатен со музички изведби. Директорката на Центарот за култура, Фарие Адили на учесниците и поддржувачите им додели благодарници.

Одбележувањето на 21 Март во Гостивар се организираше со поддршка на Министерството за култура и туризам.