Гостиварци хумани – даруваат крвна плазма за лекување на ковид болни

И во време на пандемија гостиварци ја потврдуваат својата хуманост и солидарност. Дека Гостивар ги негува хуманите вредности се покажува и преку интересот за дарување на крвна плазма, која се користи за лекување на заболени од ковид. Во службата за трансфузиологија во гостиварската болница секојдневно доаѓаат граѓани, оздравени од ковид кои сакаат да даруваат конвалесцентна плазма.

„Конвалесцентната плазма е потребна за лекување на многу ковид пациенти, потребите се навистина големи. Во Гостивар може да кажеме дека има интерес кај граѓани кои прележале ковид, сакаат и доаѓаат да даруваат. Во нашата служба се обраќаат до 5-6 лица дневно, кои искажуваат интерес да даруваат конвалесцентна плазма. Денес, на пример токму во моментот кога зборуваме имаме два дарители, кои ја покажаа својата хуманост на овој начин.“, рече д-р Кадри Елези од Службата за трансфузиологија во Гостивар.

За едно лице да може да дарува плазма, неопходно е да поминат најмалку 28 дена на комплетно оздравување од ковид, како и да не боледува од други болести. Треба да биде  на возраст од 18 до 60 години, со телесна тежина поголема од 55 килограми.

Д-р Елези нагласува дека многу е важно дарителот да има развиено соодветна концентрација на антитела во организмот. „Ние како доктори мора да видиме резултати од анализи на антитела, за да знаеме дали тоа лице е соодветно да биде дарител на конвалесцентна плазма. Многу е важно тоа, таа концентрација на антитела треба да биде во параметри потребни за лекување на болните“, вели д-р Елези.

Конвалесцентната плазма се врзува за вирусот во организмот на болниот, го намалува неговото дејство, а со тоа и прогресијата на болеста.

Ваков вид на терапија за првпат бил воведен пред еден век за време на светската пандемија на шпански грип.