Гостиварци повлекоа црвена линија за Русино: Дислокација и никако поинаку!

Гостиварци нема да отстапат од барањето Русино да се дислоцира и не се согласуваат со реализација на проект за уредување. Децидни се за дислокација на депонијата и не се согласуваат со никакви поинакви решенија.

Вчеравечер, Граѓанската иницијатива „Стоп Русино, чист воздух за Гостивар“ одржа состанок и ги утврди ставовите и барањата, со кои ќе излезат на јавната дебата што ја организира Општина Гостивар утре.

„На состанокот граѓаните го искажаа својот револт и дадоа свои идеи и мислења како би делувале понатаму. Излегуваме со наши цели, барања и тоа: Итно да престане и да се спречи палењето на отпадот на Русино, потоа да се затвори Русино, која не е ни депонија, туку обично ѓубриште и трето, да се преземат итни мерки да се санира тој простор и ѓубрето што е веќе таму. Компромис со здравјето не се прави. Тоа е многу важно да се знае, затоа што станува збор за многу сериозни последици по здравјето на граѓаните. Ова се нашите крајни барања, од кои нема да отстапиме. Тоа се барања на граѓаните на Гостивар, не се само на поединци.“, рече Бујар Креци од Граѓанската иницијатива.

Од Стоп Русино велат дека ќе продолжат со протести, согласно мерките за заштита од ковид, а следните чекори ќе ги преземаат зависно од развојот на настаните со Русино.

Јавната дебата утре ќе се одржи во 19 часот во Летниот Амфитеатар. Според најавата присутни ќе бидат Градоначалникот на Општина Гостивар, Арбен Таравари, претставници на Центарот за развој на Полошкиот плански регион, преставници на Министерство за животна средина и просторно планирање и претставници на EAER/SECO, преку кои се спроведува проект за управување со отпадот во полошкиот регион.