Гостиварци засукаа ракави-„Генералка викенд“ како порака за еколошко освестување

Гостивар се вклучи во еколошката активност „Генералка викенд“, заедно со 25 други општини во земјава. Утрово беа организирани акции за чистење на неколку локации во градот, а во нив учествуваа општинската администрација, јавните претпријатија, советници, ученици и професори од гостиварските училишта, претставници на здруженија и граѓани екологисти.

„Целта е да влијаеме на луѓето да размислуваат што повеќе за хигиената и чистотата во градот, доколку може, секој од нас да помогне нашиот град да биде почист. Акцијата е повеќе симболична, колку да пренесеме порака дека чистотата треба да ја имаме секојдневно, не само еден ден. Се надевам дека колку толку ова ќе влијае врз совеста на сите граѓани за да имаме почиста општина“, изјави градоначалникот Арбен Таравари, кој и самиот денес во рамки на акцијата се зафати со собирање отпадоци долж Кејот на Вардар.

„Генералка викенд“ е во организација на компанијата Мен енд маунтен во партнерство со Пивара Скопје и Пакомак, со поддршка на локалните самоупрви.

Целта е да се собере што е можно повеќе отпад кој потоа ќе се носи до најблиската ПАКОМАК или локална станица за отпад. Со секои 10 кг отпад, се придонесува во засадувањето на новите пристапни шуми “СОНЧЕВА ГОРА” – национални зелени споменици што ќе растат секоја година.