Гостиварецот Бурхан Ахмети на меѓународна изложба „Од отпад до уметност“ во Азербејџан

Уметникот Бурхан Ахмети учествува на 8-та меѓународна изложба во музејот „From waste to Art”“ што се одржува во Баку, Азербејџан од 21-ви септември до 1-ви октомври. Во текот на неговиот престој во Баку, гостиварскиот уметник ќе реализира инсталација со комбинирана техника во два слоја пластични кеси и на плексиглас плочки ќе го гравира портретот на Насими (познат поет и филозоф од Азербејџан).

„Се чувствувам привилегиран што добив важна покана од Азербејџан и ми се одобри идејното решение за инсталација со комбинирана техника “Од отпад до уметност”. Двата слоја од инсталацијата, ќе бидат одвоени со 6 проѕирни акрилни плочки, поврзани како мозаик. На првиот дел ќе може да се види портретот на Насими како гравура, а во позадина на вториот дел на мозаик плочките ќе бидат залепени сино-бели пластични пластични кеси кои истовремено го симболизираат и глобалното затоплување. На портретот и рацете на Насими, на задниот слој ќе бидат залепени бели пластични кеси кои ја симболизираат светлината, мирот и чистотијата“, изјави Ахмети за Gostivarpress.mk.

Проект „Од отпад до уметност“ се спроведува во Баку од 2012 година, со поддршка на Фондацијата Хејдар Алијев, предводена од првата дама на Азербејџан, Мехрибан Алиева. Целта е да се зголеми вниманието кон одговорен пристап за заштитата на животната средина. Во проектот учествувале над 150 ументици, од 40-тина земји низ целиот свет: Холандија, Куба, Велика Британија, САД, Колумбија, Шпанија, Франција, Германија, Италија, Албанија, Белорусија, Јапонија, Австралија и други.

Бурхан Ахмети е роден 1978 година во гостиварско Дебреше. Член е на ДЛУМ, има реализирано многубројни самостојни и групни изложби во земјава и странство, добитник е на значајни ликовни награди и учесник во над стотина ликовни колонии. Автор е на скулптурата со името на градот, која е поставена на Кејот на Вардар.