Гостиварецот Муслиу во пресрет на дуелот со Холандија: Мотивирани сме и покрај поразите, имаме што да кажаме на овој меч

Македонската фудбалска репрезентација пред утрешниот дуел со Холандија, попладнево ќе одржи тренинг на „Јохан Кројф“ арената во Амстердам.

Висар Муслиу на вчерашната прес конференција рече дека одат до крај во желбата за победа.

„Нормално е дека сме малку разочарани од резултатите, затоа што посакувавме и очекувавме повеќе. Но, мотивирани сме пред Холандија, ние сме професионалци, ја претставуваме Македонија и ќе играме до крај во желбата за победа. Секако дека имаме што да кажеме и на овој последен меч. Холандија е исклучително силна репрезентација, без разлика во каков состав ќе игра, па единствено со тимска игра можеме да ги победиме. Знаеме дека ќе играат офанзивно, а наше ќе биде со цврста игра на средината и преку контранапади да се обидеме да ги изненадиме. Се надевам дека на овој натпревар ќе бидеме на нашето највисоко ниво“, рече гостиварецот Муслиу.

Натпреварот меѓу Македонија и Холандија во третото коло од групата Ц утре се игра со почеток од 18 часот.