Гостиварец со фалс картичка купувал мобилни на интернет

Секторот за компјутерски криминал и дигитална форензика при МВР до Основното јавно обвинителство-Гостивар поднесе кривична пријава против гостиварец за сторено кривично дело “изработка и употреба на лажна платежна картичка“.  Како што наведуваат од МВР, лицето со намера да се стекне со противправна имотна корист во октомври минатата година со фалсификување платежни картички на странски државјани купувал мобилни телефони преку интернет продажба.
„Пријавениот прибавил банкарски податоци од вистински платежни картици, односно од носителите на странски платежни картици, со кои извршил повеќе успешни нелегални трансакции на интернет страница при што на 21.10.2016 година купил три мобилни телефони. На овој начин извршил една успешна нелегална трансакција во вредност од 183.597 денари со што сторил кривично дело “изработка и употреба на лажна платежна картичка“, стои во полициското соопштение.
Секторот за компјутерски криминал и дигитална форензика одзел еден од трите мобилни телефони кој бил доставен и нарачан со фалсификувана платежна картичка. Од анализата на вештачењето од неговиот личен мобилен телефон претходно одземен со потврда за привремено одземени предмети било констатирано дека пријавениот преку социјалните мрежи остварувал комуникација со други лица во врска со извршување на нелегални трансакции со фалсификувана платежна картичка, како и околу порачки со истите платежни картички на компјутерска опрема и мобилни телефони. Исто така во комуникацијата зборувал за нелегалната трансакција со која се поврзани трите мобилни телефони и дека во иднина ќе продолжел да ги нарачува.