Гостиварецот Глигоровски промовираше два албума со народна музика

Познатиот изведувач на македонски народни песни од Гостивар, Владо Глигоровски денес промовираше два нови албума. Станува збор за албумите:  “Македонски бисери” , кој содржи 17 песни и “Свирете ми трубачи” со 10 песни – двата во продукција на Мистер Компани-Гостивар.

Гостите имаа можност да се потсетат на почетоците и кариерата на Глигоровски, кој и покрај динамичниот деловен живот, секогаш наоѓа време за својата голема љубов – музиката. Самиот пејач им се заблагодари на присуството и поддршката со ветување дека ќе продолжи да го негува македонскиот мелос.

На промоцијата, која се одржа во ресторанот „Кај Науме“ во Скопје,  присуствуваа познати имиња од музичката фела во Македонија: Зуица Лазова, Наум Петрески, Ванчо Тарабунов, Ирена Спасовска, Круме Спасовски и др.

Датумот на промоцијата на двата нови албума не беше избран случајно: пејачот Глигоровски со овој настан го прослави својот роденден.