Гостиварецот Крстески меѓу најдобрите на конкурсот за необјавена песна

Дејан Крстески, млад автор од Гостивар, со својата творба „Последната книга“, влезе меѓу десетте финалисти на конкурсот за необјавена песна што го распиша Националната и универзитетска библиотека „Св. Климент Охридски“ од Скопје. Конкурсот се организира по повод „Ден на читателот“, манифестација која ќе се одржи во понеделник (6 март) во просториите на библиотеката. На настанот, Крстески ќе се претстави со избраната творба.

„Пишувањето не е моја прва љубов. Но, секако е мојата најголема љубов и преокупација во изминатиов период. Човекот е најсреќен кога го работи тоа што го сака. Задоволството е уште поголемо кога она што го создавам им се допаѓа на луѓето, читателите на моите книги. Но, посебна тежина и вредност за мене, секако имаат оние признанија кои ги добивам од колегите автори или како во овој случај стручно-жири. Неизмерно ми е драго што мојата песна, според членовите на жирито, е една од десетте најуспешни творби. Останува да видиме кои творби ќе бидат прогласени за најуспешни на самата манифестација. Независно од тоа дали ќе биде избрана како најдобра, чувството е прекрасно кога луѓето го препознаваат квалитетот во тоа што го пишувам и воедно го вреднуваат. Всушност, тоа е чувство кое не може да се опише со зборови. Па колку и да звучи парадоксално, понекогаш и писателот останува без зборови. Иако морам да нагласам дека  не пишувам за признанија и критики туку за да пренесам порака до читателот, сепак дефинитивно годи, признанијата и наградите се мелем за душата на писателот“, вели Крстески.

Од неодамна двете негови книги „Поглед кон небото“ и „Луѓе без лице“ се поставени на најголемата е-библиотека на македонски јазик, Македоника. Воедно книгата „Луѓе без лице“ ја доби наградата за најчитана книга во септември од страна на Македоника и УНЕСКО.

Манифестацијата „Ден на читателот“ има за цел да се популаризира книгата, да се поттикне интересот за читањето и да се зголеми желбата за посетување на библиотеките. На настанот ќе биде прогласен и најчитаниот автор во Македонија за 2016-та година.