Гостиварецот Нанков со награда на Балканската „Правнијада“

Младиот студент по правни науки, Нинослав Нанков од Гостивар беше дел од тимот што ја претстави Македонија на Балканската „Правнијада“. Нашиот сограѓанин таму освои трето место по ораторство, што е негов најнов успех на полето на говорништвото.

Балканската „Правнијадата“ е собир на студентите од правните факултети од земјите на бивша СФРЈ. Годинава се одржа во Ниш, Србија во периодот од 10 до 14-ти мај. Во рамки на настанот се организираат натпревари во разни категории: спорт, симулации на судења, шах, ораторство и друго. Македонскиот тим од Правниот факултет од Скопје го сочинуваа тринаесет члена, меѓу кои беше и гостиварецот Нинослав, за кого ова беше прво учество на „Правнијада“.

„За мене целиот настан беше убаво искуство, дружење и градење на натпреварувачкиот дух. Чест ми е што освоив награда и што добив доста позитивни коментари од жири комисијата. Сетоа тоа ми е поттик да продолжам во иста насока и понатаму“, вели идниот правник.

Минатата година, на Ораторската вечер на факултетот за правни науки „Јустинијан Први“ , Нанков освои две награди: второ место од стручното жири и специјална награда за најдобра интерпретација што се доделува во чест на починатиот актер Бранко Ѓорчев.