Гостиварецот Реџепи со своја изложба во Скопје

Во Националната галерија Чифте Амам во Скопје поставена е изложба на скулпторот Џезаир Реџепи од Гостивар. Пред љубителите на уметноста, гостиварецот се претставува со десет скулптури изработени од дрво, метал, полиестер, полимер како и со еден видео арт.

За делата на Реџепи, академскиот професор Џелил Руфати вели: „Сите изложени скулптури се слободни во поглед на идејата, изведени во геометриски и еспресивен дух. Во сите дела, имаме динамични потези и ритам на форми. Сите форми се стилизирани и ослободени од детали. Во некои скулптури имаме перфорирани форми кои создаваат игра на светлината и сенката. Во делата на Џезаир Реџепи, не е присутна традиционалната скулптури, туку една игра со пластични форми и разни материјали кои ја зголемуваат уметничката вредност на делата. Од ова се гледа дека Џезаир Реџепи е уметник кој ветува, и во иднина ќе нè изненади и со други дела со уште повисоки уметнички вредности“.

Кустосот Горанчо Ѓорѓиевски, историчар на уметноста во својот осверт потенцира: „Преку своето творештво Реџепи создава дела со спиритуална атмосфера, тоа се дела кои не ги преуредуваат секојдневните предмети и објекти, но наместо тоа го менуваат секојдневниот живот како продуктивна уметничка сила, ги допираат сите области од животот во контекст на тотално уметничко дело. Во потрагата по наоѓање на сопствен визуелен израз Џезаир Реџепи во скулптурата се движи во областа на апстрактно-геометризираната скулптурална форма и спојот како на формите, така и на материјалите“.

Изложбата во Скопје беше отворена минатата недела и ќе трае до среда.

Џезаир Реџепи е роден во Тануше, Горна Река во 1983 година. Дипломирал на Факултетот за ликовни уметности во Тетово и работи во Конзерваторскиот центар во Гостивар.