Гостиварки претпочитаат царски рез наместо природно породување

За разлика од претходно, кога најголемиот дел од породувањата се вршеа по природен пат, последниве години расте бројот на раѓања со царски рез. Статистиката на гинеколошко-акушерското одделение во гостиварската болница покажува дека половина од жените родилки, бебињата ги донесуваат на свет со царски рез. Лекарите сметаат дека Гостивар не е исклучок и дека ваквиот тренд го има и во болниците во другите градови низ Македонија. Процентот на породувања по пат на царски рез, е уште повисок во приватните болници.

„Жените мислат дека како родилки со царскиот рез се попривилегирани. Веќе не сакаат да се „мачат“ да раѓаат по природен пат и често се случува да не соработуваат со докторот, па раѓањето мора да заврши во операциона сала“, изјави д-р Агим Јакупи, гинеколог-акушер во општата болница во Гостивар.

Лекарите не можат точно да ги детектираат причините за зголемувањето на раѓањата со операција. Дали повеќе се работи за желба или медицинска потреба? На одделението имале различни примери, но бележат дека главно, младите родилки сами бараат породувањето да се изврши со царски рез.

Анализите на Фондот за здравство покажуваат дека царскиот рез е најчестата хируршка интервенција во болничките установи во Македонија.