Gostivarpress.mk во хипи кампот кај Црн Камен: Не сме голи луѓе кои прават глупости, имаме убави намери, ја сакаме природата

Стотиците странски кампери кај месноста Црн Камен близу Леуново, деновиве го сврте вниманието на јавноста и предизвика најразлични реакции и коментари. Се работи за неформална група под името „Rainbow Gathering“ која е отворена за секој што сака да се придружи, а се декларира како љубител на природата и собирите на отворено на кои се прават дружби, рутуали со палење оган на полна месечина и сл.

Gostivarpress.mk денеска го посети кампот и поразговара со неколку учесници, кои ги има од сите страни на светот: Франција, САД, Израел, Литванија, Полска, Белгија, Германија, Австрија, Италија, Чешка, Србија, Хрватска, Грција, Бугарија и еден учесник од Мексико. Со нас споделија дека се воодушевени од природата во мавровскиот крај, уживаат во престојот, меѓу другото организираат и акции за чистење на сметот, но сметаат дека населението не ги прифаќа и не ја разбира нивната намера.

„Ова ни е прв собир кој е толку блиску до цивилизацијата и во близина на локалното население. И мојот проблем е што мислам дека луѓето не ја сфаќаат идејата, не ја разбираат. Само мислат дека сме голи луѓе кои прават глупости. Не е така. Се работи за природата, за духовното, за чувството на себеси. И имам информација дека доаѓаат дронови кои не сликаат, не го сакаме тоа. Ние не, не го сакаме ова да не претстават како шоу, како група на голи, страшни луѓе. Ние имаме убави намери, ја сакаме природата. Знаете, кога дојдовме овде имаше многу ѓубре, имаше многу расфрлана пластика. Го собираме сето тоа. Многу е почисто сега, секој може да види.“, рече една од учесничките која доаѓа од Полска.

Според нејзината другарка, исто така од Полска, нивната група не е никаква организација од која луѓето треба да стравуваат и ги покани жителите од околината да ги посетат на дружење.

„Ова не е некоја организација или нешто слично. Само се среќаваме неформално, се среќаваме секоја година на некое место и само сакаме да го почувствуваме духот на природата. И сакам да кажам, ако локалните луѓе сакаат да дојдат, секогаш се добредојдени, се разбира. Но, не да пиеме пиво и правиме лудории, туку да поразговараме со некого и да пренесеме малку за нашата идеја. И јас сум новинарка, работам во онлајн и печатен медиум, доаѓам од мал град од Полска и јасни ни се работите, каде што луѓето велат дека ништо не се случува наоколу, но кога ќе се случи нешто имаат проблем дека нешто се случува. Да, секогаш ќе има и луѓе на кои не им се допаѓа.“, рече девојката, посочувајќи дека во текот на престојот запознале и луѓе кои биле срдечни и пријателски настроени. „Да, запознавме многу локални луѓе кои беа толку срдечни. Затоа ви благодариме за ова место. И благодарам што можеме да бидеме тука. Знам дека не им се допаѓа на сите, но ние не правиме ништо како лоши работи. Ние се грижиме и уживаме во природата, не фрламе ѓубре, овде не пиеме алкохол или правиме други несакани работи како што мислат луѓето во селото.“, кажа таа.

Иако камперите се претставија како неорганизирани и спонтано собрани туристи, за присуството на непознати на „нивна територија“ се алармираа со посебен гласен крик, секој кој прв ќе ја забележеше екипата на Gostivarpress.mk веднаш сигнализираше со истиот чуден крик, за на крај, како ни појасниja група на кампери од Израел, тоа било поради нашата фото камера, а не поради присуството на луѓе.

Камперите претходно престојувале во околината на селото Жировница, но оттаму со посредство на НП Маврово и полицијата биле преместени, со оглед дека станува збор за строго заштено подрачје. Жителите и сопствениците на викендици од Леуново и Ниќифорово реагираат и се противат на „дивиот камп“ , прашуваат каде се вршат физиолошките потреби, зошто не важи забраната за палење на огнови и сл.

Според најавите, групата планира да остане во земјава до 16 август, кога планираат церемонија на полна месечина, а потоа ќе заминат.