Гостиварската градска библиотека се сели во нов простор

Неодамна започнаа работите за дислокација на градската библиотека во Гостивар. Од досегашните простории на кат во Центарот за култура АСНОМ, библиотеката се сели во просторијата од лево на самиот влез во објектот на установата.

Веќе се работи на уредување на просторот со полици и друг потребен инвентар, а се врши и преместување на книгите, дел од по дел.

Директорката на Центарот за култура, во чиј склоп функционира библиотеката Фарије Адили, вели дека тоа се прави со цел подобри услови и поголема достапност за читателите.

„На барање на читателите и граѓаните, со иницијатива на вработените почнаа работите за преместување на градската библиотека. Новите простории се на повидливо и постапно место, како што и доликува на библиотека. Сметаме дека на тој начин се создават подобри услови како за читателите, така и за вработените, а исто така и се поттикнуваат и мотивираат граѓаните да станат членови, и да се развива читачката култура“, рече Адили.

Според најавите, работите треба да се комплетираат во септември, за кога е планирано и свечено отворање и промоција.

Во меѓувреме во тек е регистрација на нови членови и обнова на членството.

Инаку, градската библиотека во Гостивар датира од 1949 година. Располага со богат книжен фонд на македонски, албански, турски јазик различна литература, лектири, белетристика, дела на класици, стручни книги итн.

Поделена е во два оддела: во Одделот за возрасни има околу 57.000 книги, додека во детскиот околу 17.500. Во делот на книги од роднокрајни автори има околу 300 книги. Најчести посетители и најверни читатели се учениците и пензионерите.

Библиотеката од 2008 година е вклучена во процесот на дигитализација.