Гостиварски компании во канџи на интернет измамници

Вешти хакери преку упад во електронските пошти на компании и граѓани им извлекуваат големи суми на пари од нивните сметки. Гостивар е заплеткан во мрежа на интернет измами. До нашата редакција изминатиот период стигнаа неколку реакции за ваков вид на измами. Со обраќањето до медиумите, оштетените сакаат да испратат предупредување до другите фирми, да бидат максимално внимателни при интернет трансакции. Исто така сакаат да укажат на потребата од поголема безбедност при онлајн плаќањата каде се вртат големи суми на пари.

Во една од нив, позната гостиварска компанија која врши извоз на производи, за конец избегнала да уплати 10 илјади евра на погрешна сметка, па парите за малку наместо кај бизнис партнерот ќе стигнеле до хакерот. За среќа, стручната служба во компанијата во последен момент решила да изврши детална проверка и исконтактирала со својот деловен соработник, па увиделе дека се работи за измама и си ги спасиле парите. Друга фирма немала толкава среќа и останала без 2.000 евра кои легнале на сметката на хакерите.

Како најчесто функционира компјутерскиот криминал? Добро организирани меѓународни криминални групи со спам-пораки и други хакерски методи  успеваат да ја украдат лозинката на е-мејлот на странскиот бизнис-партнер при што добиваат непречен пристап до историјата на целокупната комуникација со домашната фирма. Потоа креираат нови е-мејл адреси кои речиси незабележливо се разликуваат од оригиналните. Ја преземаат оригиналната порака, ја модифицираат и ја праќаат на  лажно креираната електронска адреса. Потоа праќаат порака до партнерот дека ја  промениле банкарската сметка за уплата на средствата и бараат парите да се уплаќаат на новата сметка, која ја доставуваат во прилог.

Официјална пријава во полициското одделение надлежно за компјутерски криминал во Гостивар, за оваа година нема. Но, од таму апелираат на особена внимателност при интернет трансакциите, особено кога се работи за поголеми суми на пари.  Најдобриот начин за борба против овој вид на криминал е превенцијата и високото ниво на свест при користење на интернет мрежата во деловната комуникација, потсетуваат надлежните.

Една од најважните препораки е задолжително да се прави телефонска или друг вид на потврда со деловниот соработник за договорените фактури, особено ако се воочи измена во банкарските податоци каде треба да се уплатат паричните средства.