Гостиварски театар ги подготвува претставите „Манијак“ и „Цилиндар“

Гостиварски театар започна со реализација на програмата предвидена за 2025-та година со подготовка на две нови претстави. Станува збор за претставите „Манијак“ на македонски јазик и „Цилиндар“ на албански јазик.

Комедијата „Манијак“ е по текст на Ратко Бијелчиќ, во режија на Елеонора Теова, а улогите ги играат: Марко Дојоски, Ирена Илиевска и Елизабета Младеновска. Темата е околу состојбите кои настануваат од лажните вести во медиумите. Претставата „Цилиндар“ се работи по текст на Едуардо де Филипо, додека режијата е на Афрдита Нухију.

Како што информираше директорот на Гостиварски театар, Сулејман Рушити на денешната прес конферција, годинава планирано е да се реализираат вкупно пет претстави, од кои една за деца. Тој изрази надеж дека во соработка и со заеднички сили на централната и локалната власт ќе се изнаоѓаат решенија за проблемите и предизвиците со кои се соочува установата, особено во однос на просторните услови.