Гостиварски училишта добија грант од МОН за проекти за развој на мултикултурализам

Министерството за образование и наука на својата веб-страница ги објави резултатите од Јавниот повик за доделување средства за реализација на активности кои придонесуваат за развој и унапредување на мултикулурализмот, меѓуетничката интеграција и толеранција.

На листата на основни училишта кои ќе добијат грантови, според бодови од рангирањето има седумдесет основни и  25 средни училишта. Меѓу нив се и гостиварските основни училишта „Мустафа Ќемал Ататурк“ и „Фаик Коница“ (Дебреше), како и средните> гимназија и техничко.

Активностите за кои ќе добијат грант повеќето од избраните основни училишта ќе ги реализираат во партнерство со други училишта, а неколку – самостојно.

Во објавата на резултатите со двете листи на училишта, МОН наведува дека со изградба на мултиетничко и мултикултурно општество се овозможува градење современи, успешни и ефективни воспитно-образовни установи кои ќе ги промовираат мултиетничките и мултикултурните вредности, индивидуализираниот пристап кон учениците, позитивна емоционална клима и конструктивна повеќенасочна комуникација во пријатен и поттикнувачки училишен амбиент.