Гостиварскиот Совет едногласно ја донесе Развојната Програма за 2019-та година

Советниците на денешната деветта седница на Советот, ја изгласаа Развојната Програма на општина Гостивар за 2019-та година. Таа содржи проекти, зафати и инвестиции кои се мапирани како приоритетни и важни за градот, околните населби и населените места. Предложената Програмата претходно беше надополнета со предлози од повеќето советнички групи.

Најмногу предлози дојдоа од Зоран Ангелов, координатор на советничката група на СДСМ. Тој реагираше дека доцна бил известен за јавната дебата за Програмата и затоа на седницата излегува со над 15 предлози.

Дел од предлозите на Ангелов беа уредување на улици, водоводни линии, канализации во делови од градот и низ Циглана, Бањица, Фазанерија, Тумчевиште и други места, санација на спортската сала во економското училиште, изградба на пречистителна станица за фекални води, изградба на нов пат од Фазанерија до манастирот Св.Преображение, покриен пазар по моделот приватно – јавно партнерство, отворање на бул. „Браќа Ѓиноски“ и друго.

По паузата за надополнување, Програмата со сите изнесени предлози на седницата, беше усвоена едногласно.

Конечното реализирање на проектите кои се вметнати во Развојната Програма, сепак на крај ќе зависи од расположливите средства во буџетот за 2019-та, кој е во подготовка и треба да се најде на гласање пред Советот до крајот на годината.