Гостиварскиот уметник Меџити со самостојна изложба во Скопје

Викендов во Културно информативниот центар во Скопје, беше отворена самостојна изложба на гостиварскиот уметник, Башким Меџити. Пред љубителите на сликарството, Меџити се претстави со триесетина слики работени во техника акрил создадени во последниве две години, во рамки на циклусот насловен “Временски димензии”.

“Во уметничкиот свет на Башким се раѓаат звуци при што доаѓа до израз осветувањето на древниот јазик и писмо, како и замислени композиции со сензации на бојата и позадината кадешто таа се исфрла. Неговите слики, на прв поглед изгледаат неконтролирани, боите како да се расфрлени, но позадината е полна со симболи и метафори на хармонија и дисхармонија”, рече професорката по историја на уметност, Јелдез Асани, на свеченото отворање.

Деканот на факултетот на уметности при ДУТ, Мифтар Мемети, истакна дека сликарот е препознатлив по тоа што е исклучително посветен на својата работата и по  неговата скромност.

“Башким го познавам уште од осумдесеттите години, кога беше многу млад. Отсекогаш бил многу посветен во работата. Не е само одличен сликар, туку и истакнат скулптор, цртач и графичар. Тој успева од доста прецизен реалист, да се трансформира во експресионистички модернист”, нагласи Мемети.

Башким Меџити е професор на Факултетот за уметности при ДУТ. До сега имал 14 самостојни  изложби, а учествувал и на многу групни изложби и уметнички колонии во земјава и во странство.