Гостиварските училишта ги отворија вратите за првачињата

Во текот на месец мај во основните училишта се спроведува уписот на првоодделенците. Училиштата во Гостивар веќе истакнаа соопштенија за прием на првачиња со информации околу потребните документи и рокови.

Запишувањето на учениците се врши според Законот за основно образование во кој се предвидени повеќе услови.  Во прво одделение се запишува дете кое до крајот на календарската година ќе наполни 6 години, односно децата родени во 2011-та година. Исклучок може да се направи за деца родени во јануари 2012-та, на барање на родителот, но само по добиено мислење од педагогот или психологот во училиштето.

На денот на уписот родителите се должни да ги достават потребните документи. Фотокопија од извод на матична книга на родените, потврда за примени задолжителни вакцини како и потврда од систематски преглед кај стоматолог.

Правилата предвидуваат реонизација при уписите, односно детето да се запише во училиштето кое е најблиску до неговиот дом.

На подрачјето на општина Гостивар, вратите за новите првоодделенци ќе ги отворат 11 централни основни училишта и 20 подрачни.