Гостиварско архијерејско намесништво: Да се изнајде заедничко мирно законско решение за искушението во Галате

Негувањето на искрен дијалог за сите отворени прашања може да превенира и надминува секакви проблеми, порачаа денес од гостиварското архијерејско намесништво во врска со последните немили случувања околу црквата „Света Петка“ во атарот на Галате.

Архиерејскиот намесник на Гостивар протоереј-ставрофор Марјанчо Мадевски, придружуван од епархискиот адвокат на МПЦ-ТГЕ Дарко Котески, како и Горан Димитријески, Милош Димитријески и Велимир Ристески од црковниот одбор од Галате попладнево остварија средба со градоначалникот на Општина Врапчиште Исен Шабани. Како што се наведува во известието од намесништвото, целта на средбата била: „да се изнајде заедничко мирно законско решение за искушението во  Галате во духот на традиционално добриот меѓуверски соживот во гостиварско“.

„Имајќи предвид дека токму оваа црква и ова верно население веќе еднаш беа сурово оштетени во воената 2001 година, а нашето поднебје е дом на повеќе народи и вероисповедувања, апелираме на воздржаност, трезвеност и посветеност кон мирот и меѓусебното почитување, за да градиме хармонично општество со вистински вредности. Тетовско-гостиварската епархија силно го поддржува владеењето на правото и во таа смисла останува отворена за изнаоѓање на решение за секој проблем по законски пат.“, стои во соопштението.