Гостиварци се подготвуваат за прослава на Бадник и Божиќ

Ни претстојат два големи православни празници, Бадник и Божиќ, кои ќе внесат радост и топлина во секој дом. Течат последните подготовки за одбележување и прославување.

Утре на Бадник, семејството се собира на заедничка вечера со посна и богата трпеза. Според обичаите, домаќинките месат погача, во која се става паричка. Пред почнувањето на вечерата, најстариот во семејството ја благословува трпезата и го крши лепчето. Се верува дека оној кај кого ќе падне паричката, ќе го следи среќа во текот на целата година.

Во вторник, пак се слави Божиќ, денот на Христовото раѓање. Овој празник има голема симболика која се однесува на ширење на љубов, простување и милосрдие.

Во чест на Бадник, утре во Црквата Пресвета Богородица во Гостивар ќе биде отслужена утрена литургија со почеток во 7 часот. Од 10 часот дечињата со носење на витлеемската пештера и пеење на старата коледарска песна “Вечниот Бог“, ќе го најават Христовото раѓање. Тргнувајќи од црквата „Пресвета Богородица“ на градскиот плоштад, по улиците „Илинденска“ и „Гоце Делчев“ до црквата „Св.Петка“. Одбележувањето продолжува во 17 часот со вечерна богослужба, додека традиционалното палење на бадниковиот оган и огнометот се планирани за во 19 часот.

Утрото во вторник, на Божиќ, во Црквата Пресвета Богородица ќе биде ослужена утрена со Света Архиерејска Литургија со која ќе чиноначалствува Митрополитот тетовско-гостиварски г.Јосиф во сослужение на повеќе свештенослужители.  Литургијата започнува во 8.30 минути.