Гостиварци уживаа во звуците на гудачкиот квартет на Трајковска

Центарот за култура АСНОМ во Гостивар годинава го одбележа својот патрон празник и Денот на републиката, 2-ри август со вистинско концертно уживање. На големата сцена во Центарот, вчеравечер настапи гудачкиот квартет на познатата македонска виолинистка Пламенка Трајковска. Изведувачите, мајстори на своите инструменти, ја воодушевија публиката со звукот, перформансот и спојот на класиката со современите музички теркови.

„Ми претставува голема чест и задоволство што токму со еден квалитетен концерт и ваков музички настан нашата установа го одбележува државниот празник, кој воедно се поклопува и со името на Центарот „АСНОМ“, рече во своето обраќање директорот на гостиварската културна установа, Луан Зенки.

Квартетот изведе дела од албумот „Апасионато“. Заедно со Трајковска, на сцената во Гостивар настапија Наташа Диденко, Љубица Бошкоска и Ени Бучидолова.