Гостиварци заинтересирани за купување дрва на рати

Од објавувањето на огласот, на 3-ти јануари, до сега, во гостиварската подружница на Јавното претпријатие „Македонски Шуми“ склучени се договори со 40-тина граѓани за купопродажба на огревно дрво. Од шумското стопанство оценуваат дека и годинава, семејствата пројавуваат интерес да си набават дрва за следната сезона со плаќање на рати.

„Верувам дека и во наредниот период ќе има интерес, дури очекуваме и да се интензивира. Крајниот рок за поднесување на барања и склучување на договори е 31-ви март. До тој датум, цената нема да биде поскапена, односно останува иста и тоа 2.370 денари кубен метар за буково дрво и  2.450 денари за даб“, вели директорот на подружницата „Шар Гостивар“, Форе Милошевски.

Граѓаните го отплаќаат огревното дрво на шест еднакви рати. Првата рата ја уплаќаат со самото склучување на договорот, а превозот од складот до домот се плаќа дополнително. За социјално ранливите категории предвидени се попусти и други поволности. За нив се определени осум, наместо шест рати, а доколку платат одеднаш добиваат 10% попуст.

Гостиварската подружница на Јавното претпријатие Македонски шуми, минатата година продаде 12.500 метри кубни огревно дрво.