Графити низ Гостивар – “Мусо + Али = УБДА“ , „Гостивар нема место за гнилеж“ …

На неколку локации низ Гостивар испишани се бројни графити на албански јазик.  “Мусо + Али = УБДА“ , „Гостивар нема место за гнилеж“ , „Гостиварци не се овци“  се дел од пораките на графитите кои осамнаа на ѕидот кај стадионот, по бекатонки на улици и на други места.

Слични графити со пораки против партијата ДУИ, пред неколку дена се појавија и во Тетово.

Гостиварскиот градоначалник Арбен Таравари, на фејсбук статус напиша дека четворица млади активисти на неговата партија Алијанса за Албанците, биле повикани во полиција во врска со испишаните графити низ градот. „Влерим Исени, Фатон Абдули, Бесир Мемети и Азем Лазами биле повикани во полиција бидејќи “се осмелиле” да напишат некои графити со содржина која го вперува прстот кон оние луѓе за кои дење и ноќе слушаме како крадат, навредуваат, злоупотребуваат и не` презираат. Државата наместо да се занимава со тоа, се занимава со младите кои имаат свои идеали и не трпат неправди. Не ги повикувајте луѓето во полиција, туку апсете ги киднаперите на народот!“, пишува Таравари.

Од полицијата потврдија дека кај нив е пријавен случај на испишани графити и  информираа дека преземаат содветни мерки и активности за негово расчистување.