Граѓаните најавуваат целосна блокада на Русино!

Жителите од населените места близу Русино, најавуваат дека повторно ќе постават блокади на патот што води до депонијата. Граѓаните не се задоволни од текот на исполнувањето на обврските од договорот со Полошкиот плански регион. Велат дека во знак на револт нема да дозволуваат поминување на камионите кои вршат транспорт на смет од полошките општини. „Најавуваме големи блокади, нема да пропуштиме да помине ниту еден камион, ни од тетовското, ни од гостиварското комунално претпријатие. Русино ќе биде целосно затворено. Свесни сме дека не можат да се исполнат сите десет точки од договорот одеднаш, но барем да се направеше нешто повеќе, а не вака. Доста е веќе на диво да го фрлаат ѓубрето“, изјави Абдулади Хусеини, претседател на месната заедница Горна Бањица.

Граѓаните ја блокираа регионалната депонија Русино летово. По неколку дена, беше постигнат договор со Полошкиот плански регион со кој општините беа задолжени да исполнат повеќе барањата на жителите. Дел од тие барања се изградба на патот кој води до Русино, отпочнување постапка за менаџирање со депонијата, отпадот да се носи исклучиво во вечерните часови и транспортот да се врши со соодветна механизација, потоа прибирање на отпадните води од депонијата, фабрика за рециклажа и други.

Жителите сметаат дека е крајно време да се реши проблемот затоа што депонијата им го нарушува здравјето и им ги уништува нивите од каде многу од нив обезбедуваат егзистенција.