Граѓаните најмногу пијат лекови против висок притисок, за смирување и за срце

Први на листата меѓу најчесто користени лекови во Македонија се апчињата за намалување на крвен притисок, за проблеми со срцето, дијабет и за смирување. Извештајот на Фондот за здравствено осигурување за 2017 година, покажува дека како и во претходните години, најкористен лек е „enalapril“ со вкупно 2,08 милиони реализирани рецепти.  Овој лек спаѓа во групата кардиолошки лекови и делува на покачен крвен притисок. Втор по користеност е метформин, лек за дијабетичари, а на трето место е дијазепамот, кој се користи за смирување. Дијазепамот бил препишан на над еден милион рецепти.

Според податоците од ФЗО, во регионот на Полог граѓаните може да набавуваат лекови со рецепти од вкупно 89 аптеки. Во однос на бројот на осигуреници, полошкиот регион е со најмал број на аптеки кои издаваат лекови на државен товар. На 10.000 осигуреници има просечно 3,5 аптеки со договори. Гостиварските аптеки лани ја исполниле определената квота за лекови на рецепт до 97,08%.